Lobs loba namaitoj

As vīnu recepti zynu -
Lobs loba namaitoj.
Tikai vairs naatminu
Kas itū man pastostiej...

Kod skrūders šyun biksem pūgu,
Tod lobōk nasaverīs,
Var cieški nūtreisēt rūka
Un sasamudžynōt dīgs.

Jo odota obuļūs trōpēs,
Tod nabļaun vys – ratavoj!
Bet kluseidams pacīt sōpes -
Lobs loba tok namaitoj!

Kod īsi Saeimu vēlēt,
Met urnā un nasaverīs,
Tys vyss ir vīneigi spēle –
Vyss vacajōs slīdēs īs.

Tī poši kungi vīn vaļdēs
Tu bolsoj voi nabolsoj,
Tik nūsamainēsīs biļdes –
Lobs loba tok namaitoj!