Sveceite

Tī Palaidas molā,
Kur lelo prīde
Ar symtgodu līpu
Volūdys vad,
Aiz plideru žūga
Pi krysta kūka
Kaids ikvokorus
Sveceiti dadz...

Nu reita agra
Ūļneica pylna
Bārnu bolsim
Uz školu kas īt.
Gar krystu eimūt
Tī capuris cyloj,
Krystu pōrmat
Pyrms tōļōk skrīt...

Tai bierneibas godi
Gar Jaulejas molu,
Pōr Mōlejkolnu
Uz Bykovu īt...
Tai jauneiba aizskrīn,
Tik vacajā prīdē
Otkon svieteļi
Pereklī...

Vīn tulznainos rūkas,
Kas glōstieja mani
Tī palyka,
Glōsta jau myužeibu.
Reiz sveceiti īdadzūt
Vokorā vālā,
Tos deve man dzeivei
Svieteibu...
* * *
Tī Palaidas molā
Vēl lelo prīde
Ar simtgodu calmu
Volūdot grib...
Nav krysta kūka,
Nav plideru žūga,
Vīn rōdīs –
Vokorūs līsmeņa zib...