Muns spāks

Pi Malnōs kanovys,
Kaļovys golā,
Mozō Krēsleite iudini sovu
Rēzeknes upei
Prīceigi dōvoj,
Lelajam Lubōnam sveicīņus syuta,
Pošai izgaistūt Zūsora molā....

Pi pošas Īdeņas,
Lubōna klōnūs,
Pļōvieji bryduši ōriskōs pļovōs.
Svīdrainom pīrem
Izkaptis cyloj...
Itaida Latgolas ainova rōdōs,
Bierneibas eilynam īdurūt sōnūs.

Pi tāva pogolma
Aizaļksnis molā,
Verūs dūmeigs ar sōpūšu sirdi –
Diervanīnei
Byus kaidreiz atdzimt?
Gaiļakolns ataudzēs ūzulus sovus?
Īs muni mozbārni Bykovas školā?

Pi mozōs Krēsleitis
Laipeņas stōvu -
Ite man staigōja jauneibas sūļi...
Pōri parkam
Bazneicas tūrņi,
Svieteibu sanajai laimeibai syuta,
Līpai, kur pyrmūreiz tevi es skōvu...

Pi sovas dvēseles
Pīlīku rūku...
Mozō, bet dōrgō pasauļa vīta
Atgrīž man spāku, dūd ceļamaizi.
Rōdōs - es eimu
Jauneibas sūļim,
Aizmierstu ryupes i namīru sovu,
Cereibu ņemu - nu krysta kūka...